2 Samuel 14
1 洗璐雅个孻仔約押知大衛王當想念押沙龍，
2 就派人去提哥亞，對該位尋一個聰明个婦人家來，對姖講：「請你假做守孝个，著孝服，毋好打扮，就像一個守孝當久个婦人家，
3 然後到王該位去，將𠊎㧯你講个話對王講。」所以約押就教該婦人家樣般講。
4 提哥亞个婦人家就去見王，恭恭敬敬伏在地上，講：「國王啊，求你幫助𠊎！」
5 王問姖：「你有麼介事？」姖講：「𠊎係一個盡衰過个寡婦，老公早就死掉了。
6 若使女有兩個孻仔，有一日佢等在田肚吵起來就相打，無別人在該位勸開佢等，所以其中一儕打死另外一儕。
7 國王，這下𠊎所有个親屬全部看𠊎做對敵，佢等愛𠊎將孻仔交出來給佢等，愛用㓾兄弟个罪判佢死刑。佢等恁樣做，𠊎就連一個孻仔乜無了！佢等愛滅掉𠊎个香火，使吾老公在世上無孻仔好傳宗接代。」
8 王對姖講：「做你轉屋下去！𠊎會為你處理這件事。」
9 提哥亞个婦人家又對王講：「吾主吾王，願這罪歸𠊎㧯𠊎个家族，㧯王並王个家族無關係。」
10 王應講：「若係有人對你講長講短，將佢帶到𠊎這位來，佢就毋會再吵你了。」
11 婦人家講：「國王啊，請向上主—你个上帝祈禱，毋好俾𠊎該兜親屬為到愛為𠊎死掉个孻仔報血仇，卻㓾掉𠊎賸到个孻仔。」王應講：「𠊎指等永生个上主答應你：若孻仔个一條頭那毛也毋會跌在地上。」
12 該婦人家又講：「吾主吾王，請准使女再講一句話。」王應講：「你講！」
13 婦人家對王講：「你做麼介會想到害上帝个子民？你俾你个孻仔流亡在外，毋准佢轉來；你頭先講个就已經定了你自家个罪。
14 𠊎等全部一定會死，像覆水難收。上帝並無搶走人个生命，總係佢定著有辦法使一個流亡个人轉來。
15 吾主吾王，𠊎來向你講話係因為有人嚇𠊎，所以使女想，𠊎應該對王提起，或者王會照使女所求个做。
16 𠊎想王會聽，救使女脫離該想愛㓾𠊎㧯吾孻仔、將𠊎等對上帝賜佢子民个土地上除掉个人。
17 使女又想，國王个話一定會安慰𠊎，因為國王像上帝个天使共樣，能分別是非。願上主—你个上帝㧯你共下！」
18 王應講：「𠊎問你一個問題，你一定愛照實回答𠊎。」婦人家講：「吾主吾王，請你講！」
19 王問：「敢係約押喊你來勸𠊎个？」婦人家應講：「𠊎在吾主吾王面前發誓，你講个無毋著。確實係你个元帥約押吩咐𠊎恁樣做，教𠊎恁樣講个。
20 你个元帥約押恁樣做係愛挽回這件事。國王像上帝个天使恁聰明，能知世上所有个事。」
21 後來，王對約押講：「𠊎同意你恁樣做。你去將該後生人押沙龍帶轉這位來！」
22 約押恭恭敬敬伏在王面前，講：「吾主吾王，上帝賜福給你！這下僕人正知你給𠊎个恩典有幾大，因為王答應𠊎个請求。」
23 所以約押䟘起來，到基述去，帶押沙龍轉耶路撒冷。
24 總係王下令毋准押沙龍住在王宮。王講：「𠊎無愛看到佢。」所以押沙龍轉自家个屋下去，無去見王个面。
25 在全以色列，無一儕像押沙龍恁緣投，人人欣慕，對頭那頂到腳底下無一些仔缺點。
26 佢个頭那毛盡靚，逐年愛剪一擺，若無就會忒長忒賁。該剪下來个頭那毛，照王家个標準去秤，大約重兩公斤。
27 押沙龍有三個孻仔，一個妹仔；妹仔安到塔瑪，生到非常靚。
28 押沙龍住在耶路撒冷兩年，無見過王个面。
29 然後，押沙龍派人去喊約押來，愛請佢去向王求情，總係約押毋肯來。押沙龍再一擺派人去請約押，佢還係毋肯來。
30 押沙龍就對佢个僕人講：「你等看，約押个田園就在𠊎隔壁，有種大麥；你等去放火將它燒掉。」所以押沙龍該兜僕人就去放火燒該垤田。
31 約押就起身，到押沙龍屋下去問佢講：「做麼介你該兜僕人放火燒𠊎个田呢？」
32 押沙龍應約押講：「𠊎喊人請你來，你毋來。𠊎想請你到王該位去代𠊎講情，問佢做麼介愛𠊎離開基述轉來；𠊎還係留在該位較好。這下，請你為𠊎安排機會去見王；若係𠊎有罪，就俾王㓾死𠊎好了。」
33 所以，約押去見王，將押沙龍所講个向佢報告，王就派人去喊押沙龍來。押沙龍來見王，伏在王面前跪拜；王就唚押沙龍。